Навяртаньня сьв. Паўла, апостала

Дабраслаўляю Госпада ва ўсякую пору; *
хвала Яму няспынная ў вуснах маіх.

Госпадам будзе хваліцца душа мая; *
пачуюць пакорныя і ўзьвяселяцца.

Вялічайце Госпада са мною, *
і ўзносьма імя Ягонае разам.

Я шукаў Госпада, і Ён пачуў мяне *
і ад усякіх небясьпекаў маіх вызваліў мяне.

Хто прыглядваўся да Яго, тыя прасьвятліліся, *
і твары іхнія ня зьведаюць сораму.

Вось убогі паклікаў, — і Гасподзь пачуў *
і ўратаваў яго ад усіх ягоных бедаў.

Гасподні анёл паўстае вакол тых, хто баіцца Яго, — *
і іх вызваляе.

Паспытайце і ўбачыце, які добры Гасподзь! *
Дабрашчасны той чалавек, што на яго спадзяецца!

Бойцеся Госпада, усе сьвятыя Ягоныя; *
бо ня маюць нястачы тыя, што баяцца Яго.

Ільвяняты церпяць нягоды і голад, *
а богашукальнікі ня церпяць нястачы ні ў якім дабры.

Прыйдзеце, дзеці, паслухайце мяне: *
страху Гасподняму вас навучу.

Ці хоча чалавек жыць і ці любіць дабрадзенства, *
каб бачыць дабро?

Трымай язык свой ад злога *
і вусны свае ад падступных словаў.

Ухіляйся ад ліха і рабі дабро; *
шукай міру і йдзі за ім.

Вочы Гасподнія — на праведных, *
і вушы Ягоныя — на скаргу іхнюю.

А аблічча Гасподняе — супроць тых, што робяць ліхое, *
каб зьвесьці зь зямлі памяць пра іх.

Клічуць, і Гасподзь чуе, *
і ад усіх уціскаў іх вызваляе.

Блізкі Гасподзь да тых, у каго зламанае сэрца, *
і пакорлівых духам — уратуе.

Многа турботаў у праведніка, *
і ад усіх іх Гасподзь вызваляе.

Ён хавае ўсе косткі ягоныя; *
і ніводная не паламаецца!

Зло заб’е грэшніка, *
і ненавісьнікі праведнасьці загінуць.

Міласэрнасьць Госпада вечна буду апяваць, †
з пакаленьня ў пакаленьне абвяшчаць буду *
праўду Тваю вуснамі маімі.

Пастанавіў Ты запавет выбраньніку Твайму, *
прысягнуў Давіду, слузе Твайму.

Нябёсы будуць вызнаваць цуды Твае, Госпадзе, *
і праўду Тваю на сходзе святых.

Калісьці ў бачаньні гаварыў Ты сваім сьвятым і сказаў: †
«Паклаў Я ўспамогу на моцным *
і ўзвысіў выбраньніка з народа.

Выбраў Я Давіда, слугу Свайго, *
намасьціў Я яго сьвятым алейкам Маім,

і рука Мая моцная зь ім, *
і плячо Маё ўмацоўвае яго.

І праўда Мая, і міласэрнасьць Мая — з ім, *
і ў імя Маё ўзрасьце сіла яго.