II Нядзеля году

Усклікніце Богу, уся зямля. *
Сьпявайце славу імю Ягонаму;

гонар славе Ягонай, *
хвала Яму.

Скажэце Богу: *
грозны Ты ў дзеях Тваіх!

У вялікай сіле Тваёй *
упакорацца Табе ворагі Твае.

Прыйдзеце і гляньце на дзеі Бога, *
грознага ў дзеях супроць сыноў чалавечых.

Ён мора ў сушу ператварыў: †
раку перайшлі нагамі; *
там радасьць была нам у Ім.

Увайду я ў дом Твой з цэласпаленьнямі; *
аддам Табе абяцаньні мае,

якія прараклі вусны мае *
і прамовіў язык мой у бядзе маёй.

Тлустыя цэласпаленьні прынясу я Табе †
з ахвяраваннем бараноў, *
прынясу Табе быкоў з казламі.

Да Яго паклікаў я вуснамі маімі *
і ўзьвялічыў языком маім.

Хай выслухае цябе Госпад у дзень роспачы, *
хай абароніць цябе імя Бога Якубава.

Хай пашле табе ўспамогу ад сьвятыні *
і з Сыёна хай зберажэ цябе.

Хай прыгадае кожную тваю ахвяру, *
і цэласпаленьне тваё хай успрыме шчодрым.

Хай аддасьць табе паводле сэрца твайго *
і кожную задуму тваю выканае.

Цяпер спазнаў я, што ўратаваў Госпад намашчэнца Свайго: †
выслухаў яго зь неба Свайго сьвятога *
сіламі выратаваньня правіцы Яго.

Адныя — на калясьніцах, іншыя — на конях, *
а мы імя Госпада нашага сталі клікаць.

Дабраслаўляю Госпада ва ўсякую пору; *
хвала Яму няспынная ў вуснах маіх.

Госпадам будзе хваліцца душа мая; *
пачуюць пакорныя і ўзьвяселяцца.

Вялічайце Госпада са мною, *
і ўзносьма імя Ягонае разам.

Я шукаў Госпада, і Ён пачуў мяне *
і ад усякіх небясьпекаў маіх вызваліў мяне.

Хто прыглядваўся да Яго, тыя прасьвятліліся, *
і твары іхнія ня зьведаюць сораму.

Вось убогі паклікаў, — і Гасподзь пачуў *
і ўратаваў яго ад усіх ягоных бедаў.

Гасподні анёл паўстае вакол тых, хто баіцца Яго, *
— і іх вызваляе.

Паспытайце і ўбачыце, які добры Гасподзь! *
Дабрашчасны той чалавек, што на яго спадзяецца!

Блізкі Гасподзь да тых, у каго зламанае сэрца, *
і пакорлівых духам — уратуе.

Гасподзь вызваліць душу рабоў Сваіх, *
і не загіне ніхто, хто на Яго спадзяецца.