IV Нядзеля году

Вызнавайце Госпада і прызывайце імя Яго, *
абвяшчайце між народамі пра справы Яго.

Сьпявайце Яму і грайце псальмы Яму, *
апавядайце пра ўсе Яго цуды.

Пахваляйцеся іменем сьвятым, *
хай цешыцца сэрца тых, што шукаюць Госпада.

Шукайце Госпада і магутнасьці Яго, *
аблічча Яго шукайце заўсёды.

Якія ж велічныя справы Твае, Госпадзе: *
надзвычай глыбокімі сталіся задумы Твае!

Неразумны чалавек не спазнае *
і бязглузды не зразумее гэтага.

Няхай грэшныя разрастуцца, як трава, †
і будуць квітнець усе тыя, што чыняць несправядлівасьць, *
аднак гэта будзе ім на згубу на векі вечныя;

а Ты, Госпадзе, *
вечна Найвышэйшы.

Бо вось, непрыяцелі Твае, Госпадзе, †
бо вось, непрыяцелі Твае загінуць *
і расьцярушацца ўсе, што чыняць несправядлівасьць.

На Цябе, Госпадзе, спадзяюся, †
не асаромлюся навекі; *
паводле справядлівасьці Тваёй вызвалі мяне.

Прыхілі вуха Тваё да мяне, *
пасьпяшайся, каб выбавіць мяне.

Будзь для мяне скалой абароны і домам прыбежышча, *
каб збавіць мяне.

Бо Ты цьвярдыня мая і прыбежышча маё, *
і дзеля імя Твайго вядзі мяне і кіруй мною.

Выведзі мяне з пасткі, †
якую скрыта паставілі на мяне, *
бо Ты — цьвярдыня мая.

У рукі Твае аддаю дух мой. *
Ты выкупіў мяне, Госпадзе, Божа праўды.

Буду цешыцца і радавацца ў міласэрнасьці Тваёй, *
бо Ты глянуў на пакорлівасьць маю;

А я на Цябе, Госпадзе, спадзяюся; †
кажу: «Ты — мой Бог. *
У Тваіх руках — лёс мой».

Не зайздросьць ліхадзеям *
і не насьледуй тым, што робяць несправядлівасьць.

Спадзявайся на Бога і рабі дабро, *
і будзеш жыць на зямлі і даглядацца вераю.

Лепшая дробязь у справядлівага, *
чым вялікі дастатак у грэшнікаў.

Вызначыў Госпад дні беззаганных, *
і спадчына іх будзе навечна.

Не пасаромеюцца яны ў ліхую часіну *
і ў дні голаду будуць насычаны.

Крок чалавека спасіляецца Госпадам, *
і ахвотна пойдзе той шляхам Яго.

Ухіляйся ад ліха і рабі дабро, *
і будзеш ты жыць у вяках.